L'orriu

( Ghjuvannandria Culioli )

Ni vedi spuntà lu soli
À livanti à la marina
È pari ch'iddu fighjoli
Quandu varchi à Roccapina
L'orriu li Culioli
Ispostu sulla cullina!


Ispostu à l'acqua è al ventu
Ferma sempri in sintinella ;
Vidi li monti di Tempiu
È navicà li battella!
Vidi à Cagna à unghji mumentu,
Vidi Asinau è Bavella.


Di punta à L'Arcinivala
Fighjola senza rigrettu,
Servini di canuchjala
À tutta la piaghja d'Afretu.
Da quì la vista si regala,
À fiancu,davanti è dietru!


U murzu sò li so panni,
Cù la banghjaghjà chì briglia.
Sò dighjà dui cent'anni
'ddu cunnosci la famiglia.
Hà intesu cantà li nanni
Di mammona nella ziglia.


Lu Vardianu di Chera
Ghjornu di lavoru è festa,
Cù la so muta prichera
'ddu porta à nant'à la testa!
Prichemu insembu la sera
Sott'à la volta cilesta.


Monda seri à lu fuconu
Un vechju a ci dicia :
Da nant'à quistu cantonu,
À l'ora di l'Ave Maria,
Di li brunzali lu sonu
Quattordici ni sintia!


Di punt'à lu munimentu
Chì parla di cori afflittu,
U nomu di la famiglia
Dicessetti volti scrittu!
L'eroi cascati in guerra
Par l'onori è par lu drittu!


S'e t'avia lu cummandu
In Francia vintiquattr'ori
Vulia chì quistu sanguu
Di meritu è di valori
Ni pussidissi lu rangu
D'una ligion d'onori.