Aghju vistu una vechja casarella
Cu li so muri pieni di buscighe;
In tutti li tafoni ci nasce fighe
E nantu à lu so tettu arba muvrella.
Ind'una chjostra, subitu vicinu,
Fra centu stagnaroni e tanti stracci
Vegu dui cruvelli e quatru stacci,
Una conzula, un zanu e un bacinu,
Un begulellu tuttu sgangheratu,
U subbiu d'un tilaghju fora d'usu,
Una rocca in tre pezzi, senza fusu,
Un stavellu e un dentice d'aratu.
Un fiascu tarulatu, una paghjola,
Un chjerchju di tinellu tre di botte,
Una bidoghja, duie cochje rotte,
Una starghja, un zappone, una piola.
C'è ancu duie fibie di carchera,
Un arbaghjolu di pelle di 'jattu,
Un treppede, un fondu di pignattu,
Un manicu di ciara e una lumera,
Un fucilone à scaglia rughjinosu,
E, tuttu interricciatu, c'è Culombu...
Testimoni che no'avemu tombu
E chi dormenu l'ultimu riposu.