Tiadoru Poli, banditu
Santu CASANOVA

(Annu Corsu - 1932)


Tiadoru fù elettu re di a machja da tutti i banditi corsi riuniti in furesta d'Aitoni versu u 20 di u
seculu passatu. Stu munarca curunatu sottu i pini era di Guagnu, paese ospitalieru cu i frusteri
e sempre in uerra tra di elli .
Nantu sta tarra di libertà e di focu, e croce funebre par indica u passageru duva l'omu era
cascatu di malamorte nascianu da par elle cume i funghi. Sempre par mutivi insignificanti,
parechji si facianu banditi u un lascia spegne a riputazione di fieri.

Tiadoru à l'età di vinti anni era toccu cuscrittu e fù chjamatu à rendesi in Aiacciu par lascià u
pilone e mettesi i calzoni rossi. Abezzu a suna di cialamella e a guidà e picurelle sottu à i fai
cume Arminia, ricusò di risponde à l'appellu e si tinia sempre in guardia luntanu da i giandarmi.
Questi par poneli e mani pigliavanu tutte e pricauzione parchi l'acellu era piriculosu ancu in cabia.

Una bella sera, u marisciale e dui giandarmi si resenu in casa di u cuscrittu par dumandalli
un pocu di furmagliu muntagnolu. Ellu, cu moltta'razia, dumandò quantu elli ne vulianu.
"Duie picce", rispose u marisciale. Allora pigliò un spurtellu e si fece falà in cantina pa a
catarazza. Quand'ellu cullava l'aguantonu à nome di a lege e li strinsenu e manette à i polsi.

Mez'ora dopu partianu par Aiacciu cu u prighjuneru.
Dopu tre ghjorni passati in Citadella, l'aria di a calcina e di a marina pisava troppu nantu
a chjocca bullente di Tiadoru.

A mane di u quartu'jornu surti tranquillamente in cità e pigliò capu su cume u muvrellu
versi i so monti. Strada facendu, s'era pricuratu un fucile carcu à signalina.
Quandi a notte cupria i monti e le case di Guagnu l'amicu intria in paese.
Ghjuntu davanti à u prisbiteriu ha vistu u marisciale chi intria inde u curatu.
U celu era stillatu e un focu illuminava a casa.
Dopu un toccamanu tra u difinsore di l'ordine e quelludi a riligione si sò calati :
u marisciale, faccia à porta chi era spalancata e u prete avia u davanti versu u caminu.

- Allora l'acellu èin gabia ? ha dettu u prete.
- L'avemu assicuratu par sette anni, ha rispostu u marisciale.

Appena prununciate ste parolle, un colpu più forte ca u cannone intrunò u prisbiteriu
e tuttu u paese. U marisciale chi avia ricivutu tutta a carica in pettu ristò seccu nantu
a panca. U prete si vultuliava in tarra gridendu : ''Aiutu, 'o paisani, chi sò mortu !''

I paisani intrendu in casa videnu u prete cu e mani rosse da u sangue di u marisciale,
dicianu à quellu :
''Un vi vargugnate di sta cusi tranquillu davanti à un spettaculu simile ?''
Aiutu, o cristiani, chi sò mortu !'' gridava u prete.
E l'altru sempre intrepitu nantu a panca.
Allora si resenu contu : u marisciale era mortu e u prete un avia niente.

Qui cumencia a carriera sanguinosa di Tiadoru chi tirava à i giandarmi innucenti
cume à i torduli ! Trenta sei prucessi verbali di morte sò à u Parchettu ginarale di Bastia,
tutti di giandarmi tombi da Tiadoru Poli.

Una notte, à Rusazia, un certu Scialdoriu e Acillone di Guagnu piglionu una giuanotta
par forza davanti a mamma chi si ristò sola in casa à vuciarà a figliola cume morta.

Ghjastimà vogliu par sempre
A Scialdoriu e Accillone.
Ch'ellu sgotti lu so sangue
Annant'à lu me ziglione !


Duie sere dopu, Acillone passendu per Rusazia, ricivi una fuciIta e scappo' à more
in casa di a donna chi vuciarava a figliola.
A voce publica accusava à Tiadoru di a morte d'Acillone, ma a virità un s'è mai sapiuta.

- Chi di cultellu ferisce, di cultellu perisce, dice un pruerbiu antichissimu.

Tiadoru cascò anch'ellu sottu e palle vindittere di i vultisgiatori corsi, in 1831.
Ghjuntu un sabatu sera nantu e rive di u Liamone, chjappu da a puntura, si rifugiò in la
capanna d'una vediva di Guagnu chi passava culà l'imbernu cu e capre.

L'amalatu passò a notte cun forte freba. A matina, à ghjornu, a donna mandò u so pastore à
Coghja par circà u pane racummandenduli d ' un fà sapè à nimu chi Tiadoru era in capanna.
Ma u pastore ch'un pudia stà senza parlà, quand'ellu'junse à Coghja, tutti i paisani eranu
in ghjesgia ; soli tre vultisgiatori, Colonna, Fornari e Graziani sintianu a messa sottu à l'olmu
chi era in piazza. U pastore chi un pudia piu tene u sicretu, s'avicinò à quelli tre penitenti e
li dumandò s'ellu c'era niente di novu in Coghja.
Quelli intrigati da a dumanda dissenu : "Qui, un c'è nulla. E tu sai qualcosa ?

- Eiu sò qualcosa, ma bisogna à tene u sicretu cume me.
- E chi sai ? Parla.
- U pesciu 'rossu è in la reta.
- Quale, u pesciu'rossu ?
- Tiadoru ha la puntura in la capanna di a me patrona. Si vo'falate u pigliate cume un mazzardu.''

A pesca essendu'rossa e bramata, i vultisgiatori partinu di corsa e in termine d'un quartu d'ora
inturniavanu a capanna gridendu :
''Attente Laurelli, attente Colombani, attente Catiglio ! Tutti pronti !''

Burghellu, u fratellu di Tiadoru, chi era in la machja, sintendu a chjama di Colonna s'alluntanò
cridendu chi tutte e brigate fussinu cula.

Videndu u casu persu, Tiadoru fece l'ultima tentativa par sorte fora, dopu ave tiratu sopra
à Graziani. Questu avia u bracciu in pezzi ma l'altri dui fecenu focu e u banditu cascò a quatru
passi da a capanna cu sò fucile tesu nantu un ghjinochju, in attu di difesa.
I vultisgiatori stupiti un sapianu s'ellu era vivu o mortu.

Una zitella di a patrona guardava u banditu chi un si muvia.
Colonna li disse : ''Vai à vede s'ellu è mortu.

- Si vo'mi date u filare ch'ellu ha à u collu, ci vo !
- Vai puru chi u ti demu."

Quandi a zitella u tuccò, Tiadoru era mortu e un facia piu paura ài vultisgiatori ne
à i giandarmi.

A u colmu di a cuntintezza, l'eroi di a morte di Tiadoru Poli, chi duvia risunà in tutta l'Europa,
saltavanu di gioia e vuciaravanu u mortu à nome di a mugliere :

Stava tutta addulurata
Di Tiadoru la cunsorte
Quandu intese la nuvella
Ch'ell'era firitu à morte.

Oh ! s'eiu un era in partu
Aggravata da i dulori
Vulia sfugà lu me sangue
Contru li vultisgiatori.

Par assicurassi ch'ellu un fessi focu ancu dopu mortu, i vultisgiatori li scarconu u so fucile
eppo'piglionu u mulu di a pastora, attaconu u mortu pa i pedi à croce di l'umbasti, e partinu
versi Vicu gridendu à voce rivolta :
''Compra stacci, ciarnigliuli, farru, acciaghju, chjodi, stacchette e carne fresca !"

A nutizia si sparse in tutta a pruvincia e da ogni paese currianu masci e femine, vechji e zitelli.
Quandi u curteggiu intria in Vicu era scurtata da più di duie mila parsone.

Spostu in la'jesgia di Vicu chi era nantu a strada, u mortu fù cunfidatu a guardia d'un certu
Orsoni, anticu vultisgiatore chi facia u macillaru in Vicu.

Tiadoru, durante u viaghju nantu a mula avia u capu rottu. Orsoni li saldò a firita cun arbe
parfumate, li lavò tutta a faccia e li fece a strada in fronte chi avia una capillera nera e folta.

In la nuttata sei omi armati intrinu in ghjesgia, piglionu u mortu davanti à Orsoni,
e un s'è mai sapiutu duv'ellu fù intarratu.

Quandi u tribunale'junse da Aiacciu in Vicu cu tuttu l'attiragliu, un truvonu ca i muri.